tumhari bahut yaad aayi.

bahut yaad aayi tumhari....

aaj tapti dopahar me jab ghar lauta..

bikhra kamra, salwati bistaar aur..

tumhari tasweer par jami ek parat.

dekha jab tumhari di ghadi, kalam aur kitaaben

ek chota sa rumaal, chandi ki athanni

kone me pada lunch box, aur ghujhiyon ka khali dabba.

karine se sazi bhagwaan ki murtiyaan aur...

samne jale huwe dhoop ke awsesh....

takiye ke khol par tumhari nakkashi,

aur mere gale ka kala dhaga...

dekha to badi yaad aayi tumhari.

din bhar ki hatasha ke baad lauta jo ghar,

rotiyon ki sondhi gandh ki kaun kahe,

ek glass thanda pani poochhne ko jab kai naa tha,

to tumhari badi yaad aayi Maa.

haan.. Badi shiddat se yaad aayi maa.

talash jari hai....

talash jaari hai is ajnabi shahar me.... apne wazood ki.koi mukkamal shaksh, koi dharti aur kisi Aasmaan ki.

har raat aankhon me ek sapna lekar sota hoon aur..

jaag jata hoon suraj ki pahli kiran ki naram roshni ke saath,

ki aaj fir dhoondh sakun apna wazood,jise maine kho diya.

lagta hai apne wazood ki talash me mai bhi ...

mai bhi kahi kho jaunga.. is bhid ka hissa ban kahi gum jaunga.

kya tumne dekha hai kahi mera wazood....

kahi ye tumhare sirhane to nahi, tumhari palkon me.

ya ki tumhari muskurahton me ya ki aansuon me.

tumhari yaadion... me ya fir tumhare bistar ki silwaton me.

mai tanha hoon magar yakin hai tanha nahi rahunga..

dhoondh loonga wazood aur jinda rahunga,

har aksh aaine me na ho tasweer meri par..

kya pata ki teri nigahon me jinda rahunga.

khamosh dariyaa

khamosh dariyaa har jagti subah ke saath ek uneendi si angarai le ye dariyaa nikalta hai..suraj ki satrangi kirano ke sang jaise jeet lega jahan saara...par jaate jaate us viraan kinare tak,lipat jata hai asamvedna ki chadron se.aur odh leta hai tanhai ke lihaaf.. mano chupa raha ho apna wajood.us kisi ek shaksh se jiske liye hazzaron waade kiye the khabhi...bhigi raaton se lekar tapati dupahri me, samay ki shilao ke paar.ek anaam si subah me yaad karta hua use.. dhoondhta raha is ajnabi sahar me.jo ek shaksh kahi so raha hai kai jaagi uneendi raaton me karwaten badalne ke baad.chalo ek sukun to hai us jism ki ujas me jo chehra damak raha hai...raat bhar yaad aayi.. ye soch kar hi mahak raha hai...mera kya ......????mai to ek khamosh dariyaan hoon.. bah jaaunga aage aise hi khamosh..dekhna tum ki kahin kal subah.. ye nami tumhare sirhaane na ho.aage din ka taap to hai hi pure din jalane ke liye,kya hota jo adhjagi aankhon se hi..ek lahar chura li hoti.ek jism jiska pata nahi... uski rooh ko thandhak mil jati.dariiyaan to dariyaa hai... khamoshi se bah jayega...tumhari bwehad suljhi jindagi me ek uljhi daastaan bankar rah jayega.

jindagi ek mukhota hi to hai.

kya kahu.. pahle pahal laga naaraz hu tumse.... socha ki baat bhi na karu... aur kyon karu? aapni duniya me khoye tum. kabhi kisi ki parwaah nahi karte. kabhi ek kadam aage nahi badhate.. har kadam mai chalti hoon.. nazdeek aane ko aur tum fasle badhate ho. Mai janta hoon yahi soch rahi hogi tum bar aksh kahi... par halaat mazboor karte hai ki duriyon ko duri hi rahne diya jaye. kai anam se rishte hote hai jindagi me.. jinko naam nahi diyaa ja sakta. chahe tum ise mera darp kah lo . ya dar, ki koi ahankaar. par mai aisa hi hoon. bahti hawaon sa jiska kahi bhi rukna mumkin nahi... par mere saropkaar hamesha maujood honge.. saanson ke wazood ke saath ghula hai mera wazood. aur mai har sab tumse mila hua hoon kahi.. tumhari rooh me... aazma kar dekho. ye nakabposh to mere astitva ki parchhai bhar hai. ham har kadam mukhoton se ghire ek shakl bhar hai.